Presidenti i SHBA-së, Donald Trump, do të flasë me Presidentin rus Vladimir Putin të hënën për paqen në Ukrainë, ndërsa udhëheqësit evropianë kërkuan që Kremlini të pranojë një armëpushim të menjëhershëm për të ndaluar konfliktin më vdekjeprurës të rajonit që nga Lufta e Dytë Botërore. Trump, i cili thotë se dëshiron të mbahet mend si një paqebërës, ka bërë vazhdimisht thirrje për t'i dhënë fund "gjakderdhjes" së Ukrainës. Nën presionin e Trump, delegacione nga vendet ndërluftuese u takuan javën e kaluar në Stamboll për herë të parë që nga marsi i vitit 2022, pasi Putini propozoi bisedime të drejtpërdrejta. "Tema e bisedës do të jetë ndalimi i 'gjakderdhjes' që po vret mesatarisht më shumë se 5,000 ushtarë rusë dhe ukrainas në javë, dhe tregtia", shkroi Trump në faqen e tij të internetit Truth Social. "Shpresojmë që të jetë një ditë produktive, të arrihet një armëpushim dhe kjo luftë shumë e dhunshme, që nuk duhej të kishte ndodhur kurrë, të përfundojë."