Një shpërthim u fuqishëm, ka tronditur pak pas mesnate kryeqytetin, ku një sasi e konsiderueshme eksplozivi shpërtheu pranë banesës së deputetit demokrat Xhelal Mziu. Ngjarja ka ndodhur rreth orës 00:55, teksa lënda shpërthyese ishte vendosur në murin rrethues të shtëpisë së deputetit demokrat, në rrugën “Arjan Sala”. Policia bën me dije se si pasojë e shpërthimit janë shkaktuar vetëm dëme materiale. Xhelal Mziu ka dhënë dëshmi në komisariat dhe ka deklaruar se nuk ka konflikte me askënd, për këtë arsye ai ka theksuar se nuk dyshon tek ndonjë person I veçantë. Poashtu mësohet se deputeti Mziu, njëherësh ish-kryetar Bashkie në Kamëz për 2 mandate, ka qenë vetëm me bashkëshorten në shtëpi, momentin e shpërthimit. Ndonëse shtëpia e deputetit mësohet se është e pajisur me kamera sigurie, ato nuk ishin funksionale për pasojë policia nuk e ka identifikuar ende autorin. Për të bërë të mundur identifikimin e autorit apo autorëve të mundshëm, policia do të këqyrë kamerat e sigurisë në zonë, teksa ende nuk ka një pistë konkrete të përqëndrimit të hetimeve.