Një shpërthim i fortë është regjistruar paraditen e së hënës në lagjen “Manush Alimani” në Shkodër. Ngjarja ka ndodhur rreth orës 10:10, në hyrjen e një pallati. Si pasojë e shpërthimit, humbi jetën një banor i pallatit, shtetasi Hysni Imeri, 67 vjeç. Ai u transportua me urgjencë në Spitalin Rajonal të Shkodrës, por pavarësisht përpjekjeve të mjekëve, nuk arriti t’u mbijetojë plagëve të marra dhe ndërroi jetë. Menjëherë pas ngjarjes, në vendngjarje ka mbërritur grupi hetimor nën drejtimin e Prokurorisë, i cili ka nisur punën për dokumentimin e plotë të rrethanave dhe përcaktimin e shkakut të shpërthimit. Fillimisht, Policia bëri me dije se dyshohet se shpërthimi ka ndodhur në panelin e matësave të energjisë elektrike.