13 deputetë të maxhorancës, në emër të grupit parlamentar të Partisë Socialiste, kërkojnë nga Sekretariati i Etikës përjashtimin nga Kuvendi të 7 kolegëve opozitar, e shkak për këtë është bërë situata e krijuar në seancën plenare të së hënës. Deputetët demokratë akuzohen për zaptim të foltores dhe mos lejim të zhvillimit normal të seancës parlamentare, teksa deputeti Bledion Nallbati akuzohet edhe për përplasjen fizike me deputetin Vullnet Sinaj. Për sa më sipër, socialistët kërkojnë përjashtimin e deputetëve: Gazmend Bardhi, Bledion Nallbati, Flamur Noka, Edi Paloka, Albana Vokshi, Saimir Korreshi dhe Lefter Geshtenja. Ndërkohë Sekretariati pati përjashtuar edhe më herët për 10 ditë nga punimet e Kuvendit 23 deputetë demokratë, pas bllokimit të seancës parlamentare të së enjtes së 18 tetorit. Pavarësisht këtij vendimit që Sekretariati pritet të marrë opozita është shprehur e vendosur që nuk do të lejojë zhvillim normal të punimeve të Kuvendit, nëse nuk plotësohen 3 kërkesat e tyre për ngritjen e 2 komisioneve hetimore dhe përbërjen e Komisionit të Reformës elektorale.