Transportuan 25 emigrantë të paligjshëm, vihen në pranga dy të rinj dhe shpallet në kërkim një tjetër. Policia e Korçës njofton se në vijim të operacionit policor ‘Perimetri’, është goditur një tjetër rast i aktivitetit kriminal në fushën e dhënies ndihmë shtetasve të huaj për kalim të paligjshëm të kufirit kundrejt shpërblimit, si rezultat i të cilit u bë kapja dhe arrestimi në flagrancë i një 19 vjeçari, banues në Shkodër. Gjithashtu u bë ndalimi me urdhër të Prokurorisë i një 26 vjeçari, si edhe u shpall në kërkim një 27 vjeçar, banues në Tiranë. 19 vjeçari nga Shkodra është kapur nga punonjësit e Komisariatit të Policisë Devoll, në rrugën nacionale Bilisht-Korçë, në afërsi të fshatit Cangonj, duke transportuar me mjetin furgon tip ‘Benz’ 25 emigrantë të paligjshëm, të cilëve kundrejt fitimit iu kishte premtuar kalimin drejt vendeve të BE-së. Në vijim të veprimeve hetimore të kryera, dyshohet se edhe dy të rinjtë e tjerë janë të implikuar në këtë ngjarje si bashkëpunëtorë të 19-vjeçarit.