Ende nuk ka një vendim final për shkakun e aksidentit në Bullgari, që u mori jetën 45 personave. Por nga hetimet e deritanishme, rezulton se shkak i aksidentit tragjik nuk ka qenë shpejtësia me të cilin po lëvizte autobusi, ndërsa probleme janë konstatuar me aksin rrugor ku u regjistrua ngjarje. Ende nuk ka një përgjigje sesi autobusi mori flakë dhe u dogj brenda 10 minutave. Ministrja për Zhvillim Rajonal në Bullgari, Violeta Komitova njoftoi rezultatet nga ekspertiza në rrugën Dragiçevo, ku u regjistrua aksidenti. Në këtë aks rrugor shpejtësia maksimale e lejuar ishte me 120 km/orë, edhe pse sipas ekspertizës, projekti për këtë aks rrugor nuk ka qenë për autostradë. Deri në vitin 2013, shpejtësia maksimale e lejuar ishte 90 km/orë dhe më pas u çua në 120 km/orë, por e vetmja gjë që ndryshoi në rrugë ishin tabelat sinjalizuese. Sipas arkitektit Vllado Kalinov, rruga nuk ishte e përshtatshme për të lëvizur me këtë shpejtësi.