Pavarësisht se gati përditë policia po arreston persona që përpiqen të kalojnë emigrantë klandestinë nga kufiri greko-shqiptar në brendësi të vendit, trafikantët sërish vazhdojnë aktivitetin e tyre. Këtë të enjte policia e Pogradecit ka kapur një 38 vjeçar nga Kukësi duke transportuar 6 emigrantë të paligjshëm, si edhe duke drejtuar mjetin me leje drejtimi të dyshuar si të falsifikuar. Sipas njoftimit të policisë në vijim të operacionit "Perimetri" u bë kapja dhe arrestimi në flagrancë i një 38 vjeçari, banues në fshatin Shtiqen, Kukës. Ai u kap nga shërbimet e policisë në afërsi të fshatit Gështenjas, Pogradec, duke transportuar me mjetin tip "Mitsubishi", në drejtim të Tiranës, 6 emigrantë të paligjshëm, të cilëve kundrejt fitimit iu kishte premtuar kalimin e tyre drejt vendeve të BE-së.