Të paktën tetë persona u vranë dhe 14 të tjerë u plagosën nga të shtënat masive në disa fshatra të Mlladenovcit, në territorin e qytetit të Beogradit, bëri të ditur Ministria e Punëve të Brendshme e Serbisë. Sipas njoftimit, sulmuesi i dyshuar, i lindur në vitin 2002, u arrestua afër qytetit të Kragujevcit, pas disa orësh në arrati. Të shtënat u regjistruan në fshatrat Dubona, Mallo Orashje dhe Shepshin, të enjten vonë. "Policia po vazhdon punën për zbardhjen e të gjitha fakteve dhe rrethanave të kësaj ngjarjeje", thuhet në njoftimin e ministrisë serbe. Sipas disa mediave lokale, sulmuesi qëlloi mbi njerëz me një armë automatike, pasi pati një debat me një oficer të policisë, në një park në fshatin Dubona. Tre nga të plagosurit iu nënshtruan trajtimit urgjent mjekësor në një spital lokal, raportojnë gazetarët në terren. Instituti për Transfuzion të Gjakut në Serbi tha se Ministria e Shëndetësisë u ka bërë thirrje qytetarëve që të dhurojnë gjak. Ministri i Brendshëm i Serbisë, Bratisllav Gashiq, e cilësoi incidentin si "akt terrorist", shkruan portali serb i lajmeve, Telegraf. Forcat e xhandarmërisë dhe patrulla të shumta policore janë në terren. Ministrja e Shëndetësisë e Serbisë, Danica Grujiçiç, dhe shefi i Shërbimit të Zbulimit, Aleksandar Vulin, raportohet se kanë udhëtuar në zonë. Këto janë të shtënat e dyta masive që ndodhën në Serbi këtë javë. Të mërkurën, një djalë 13 vjeç vrau tetë nxënës dhe një rojë sigurie në një shkollë në qendër të Beogradit.