Presidentja e Kosovës, Vjosa Osmani ka reaguar ashpër ndaj thirrjeve antishqiptare që u dëgjuan gjatë një ndeshjeje basketbolli në Kumanovë mes Maqedonisë së Veriut dhe Rumanisë, duke i cilësuar ato të papranueshme dhe të dëmshme për frymën e bashkëjetesës ndërmjet komuniteteve evropiane. Ajo ka bërë thirrje për veprim të menjëhershëm nga autoritetet maqedonase kundër organizatorëve dhe përgjegjësve për këto thirrje, duke theksuar se shqiptarët janë popull autokton në trojet e tyre dhe meritojnë trajtim të barabartë e me dinjitet. “Edhe më shqetësues mbetet fakti që zyrtarët më të lartë shtetërorë në Shkup nuk kanë reaguar ndaj kësaj gjuhe urrejtëse e përjashtuese, duke lënë hapësirë për retorika që minojnë tolerancën ndëretnike dhe harmoninë që vendi synon të ndërtojë në rrugën e tij drejt familjes evropiane”, deklaroi Osmani mes tjerash. Ajo theksoi se sporti duhet të shërbejë si urë bashkimi dhe jo si platformë për gjuhë urrejtjeje. Presidentja nënvizoi gjithashtu përkushtimin e Republikës së Kosovës për të mbrojtur dinjitetin e shqiptarëve kudo që jetojnë.