Përfaqësuesit e vendeve anëtare të Bashkimit Evropian kanë diskutuar mbrëmjen e shkuar për zhvillimet e fundit në Kosovë dhe disa prej tyre kanë kërkuar që të vendosen masa ndaj Serbisë, nëse dëshmohet lidhja e saj me sulmet ndaj Policisë së Kosovës në Banjskë të Zveçanit. Sipas burimeve diplomatike të BE-së, duhen marrë masa ndaj Beogradit edhe nëse dëshmohet roli i Serbisë në dërgimin e armatimit në territor të Kosovës, armatim ky që u gjet së fundmi nga Policia e Kosovës në veri. “Ajo që ka ndodhur të dielën në veri të Kosovës, sasia e armëve që është gjetur, dhe informacionet që po i marrim nga terreni vazhdimisht, janë duke e ndryshuar lojën”, kanë thënë burimet brenda BE-së. Sipas tyre, në takim kanë folur përfaqësues të misionit të Bashkimit Evropian për Sundim të Ligjit (EULEX) dhe më pas i dërguari i BE-së për dialogun Kosovë-Serbi, Mirosllav Lajçak. Gjatë diskutimit është shprehur mbështetje e plotë ndaj Lajçakut për vazhdim të dialogut mes dy vendeve dhe zbatimin e marrëveshjeve të arritura deri më tani. Vendet anëtare të BE-së e kanë dënuar sulmin ndaj Policisë së Kosovës, kanë kërkuar që të zbardhet rasti dhe disa prej tyre kanë kërkuar edhe qëndrim të balancuar të BE-së ndaj Kosovës dhe Serbisë. Edhe para kësaj përplasjeje të fundit, disa vende i kanë kërkuar kryediplomatit evropian, Josep Borell, të mos e konsiderojë vetëm Kosovën përgjegjëse për përshkallëzimin e situatës në veri, më herët këtë vit. Në maj, tensionet u përshkallëzuan deri në dhunë, pasi serbët e komunave veriore nuk pranuan kryetarët e rinj shqiptarë, të dalë nga zgjedhjet që komuniteti serb i bojkotoi.