Në kohën që Sali Berisha deklaronte nga konferenca për shtyp se nuk kishte marrë asnjë fletëthirrje nga Prokuroria e Posaçme për t’u paraqitur dhe marrë në pyetje në lidhje me dosjen e ’21 Janarit’, SPAK ka dalë me një njoftim ku pretendon të kundërtën. Prokuroria e Posaçme thotë se në adresat fizike dhe elektronike të ish Kryeministrit janë dorëzuar dy urdhër-thirrjeje. I pari, sipas SPAK është dorëzuar në adresën e banesës së Berishës në datën 3 nëntor me thirrjen për t’u paraqitur në datën 7 nëntor. Kjo fletë-thirrje, thuhet në njoftim, është kthyer mbrapsh në Prokurorinë e Posaçme me shënimin: “Rojet janë autorizuar të mos marrin asnjë zarf”. Urdhër-thirrja e dytë, shton SPAK, është nisur po në datë 7 nëntor në tre adresa, përkatësisht në banesën e ish Kryeministrin, selinë e Partisë Demokratike dhe në Kuvendin e Shqipërisë. Për këtë thirrje, Prokuroria e Posaçme thotë se është refuzuar në banesë, ndërsa ka marrë përgjigje nga shërbimet e administratës së Kuvendit.