Zëdhënësi i Bashkimit Evropian, Peter Stano, i cilësoi si “akuza të pabaza” pohimet e kryeministrit të Kosovës, Albin Kurti, për të dërguarin e BE-së për dialogun, Mirosllav Lajçak, duke theksuar se ky i fundit ka mbështetjen e të gjitha shteteve anëtare të bllokut. Një ditë më parë, Albin Kurti tha në Prishtinë se gjatë takimit të fundit të dialogut mes Kosovës dhe Serbisë, të mbajtur në Bruksel më 14 shtator, Lajçak ishte “pozicionuar” kundër Kosovës. Kryeministri kosovar tha se gjatë këtij takimi, që përfundoi pa një rezultat, dukej që kishte një koordinim mes presidentit të Serbisë, Aleksandar Vuçiç, dhe të dërguarit të BE-së Lajçak për, siç tha ai, krijimin e një “skenari alternativ, ku gjysma e marrëveshjes zbatohet”. Kurti tha se Lajçak “ka deformuar” procesin e dialogut, duke pretenduar se ai nuk është përqendruar në zbatimin e plotë dhe të pakushtëzuar të Marrëveshjes drejt normalizimit , por ka lejuar “që qerrja të vihet para kuajve, Asociacioni i komunave një herë, e pastaj shohim". Ndërkohë, Stano u pyet të martën në bruksel nga gazetarët se si mund të vazhdojë dialogu në këtë format pasi Kurti hapur ka shprehur mosbesim ndaj ndërmjetësuesit të procesit, të cilin nuk e ka konsideruar si neutral dhe të paanshëm.