Gjykata e Larte ka prishur vendimin e Apelit për tenderin e uniformave në Ministrinë e Brendshme duke e kthyer çështjen për rigjykim. Gjykata e Apelit caktoi masën e sigurisë ‘arrest me burg’ për 7 të dyshuarit për tenderin e uniformave dhe 1 tjetër e ka lënë në ‘arrest shtëpie’. Lidhur me skandalin, SPAK ndaloi fillimisht 9 zyrtarë e ish-zyrtarë të Ministrisë së Brendshme lidhur me abuzimin dhe parregullsitë që ata kanë bënë për tenderin e uniformave të policisë të hedhur në verën e 2020-s për katër vitet e ardhshme. Gjatë hetimit, sipas SPAK, janë konstatuar shkelje të rregullave të prokurimit të tenderit me vlere 28 milione euro. Policisë së Shtetit i mungojnë gati 239 mijë njësi për artikuj nga uniformat e policisë pavarësisht se ishte rënë dakord që t’i dorëzoheshin gati 726 mijë artikuj siç parashikonte edhe fondi limit dhe ku përfshihen njësi si kapelet, uniforma apo edhe këpucët dimërore, verore dhe këpucët e plazhit për efektivët që patrullojnë në plazh. Mes personave të arrestuar është edhe Edlira Naqellari, ish-drejtoreshe e blerjeve të përqendruara në Ministrinë e Brendshme.