Policia e Tiranës ka arrestuar tre persona, që thotë se në bashkëpunim me njëri-tjetrin shërbenin si pikë shumice për shpërndarjen e kokainës te grupet e shitjes me pakicë të drogës në kryeqytet. Në pranga përfunduan shtetasit Elvi Meta, Igli Canaj dhe Alban Kopaçi. Policia thotë se gjatë këtij operacioni u sekuestruan në cilësinë e provës materiale një kilogramë kokainë, një armë zjarri, një armë gjahu, 121 mijë euro, 60 milionë lekë dhe 5 mijë paund. Aksioni është ndërmarrë mbrëmjen e së shtunës, kur tre personat e arrestuar po udhëtonin me automjet në Unazën e Madhe në zonën e Saukut. Policia i ka ndaluar dhe gjatë kontrolleve ka gjetur sasinë e kokainës në automjet. Operacioni është zhvendosur me kontrolle në banesën e Alban Kopaçit, ku u gjetën dhe sekuestruan shumat e parave.