Nën bimësinë e pasur të pranverës ukrainase, një njësi artilerie pret. Vetëm një pjesë e punës së tyre është hedhja e raketave nga raketa-lëshuesi i tyre 50-vjeçar. Pjesën më të madhe të kohës, ata e shpenzojnë duke gërmuar një bunker të ri në shpatin e kodrës. Ata janë bllokuar nga pushtuesit rusë, që gjenden vetëm 5 km larg, në rajonin lindor të Donetskut, ndërkohë që rusët po afrohen akoma më shumë. Municionet amerikane që po vijnë, pritet të ndihmojnë, por mënyra se si qeveria ukrainase po adreson nevojën e saj për të rekrutuar trupa të reja është e diskutueshme. Një projekt-ligj i ri mobilizimi i miratuar në prill u kritikua për mospërfshirjen e një kufiri në kohën e shërbimit. Një klauzolë që synonte çmobilizimin e ushtarëve pas tre vjetësh u hoq me kërkesë të ushtrisë. Tani, trupat e lodhur nga lufta i thanë BBC-së se ushtria duhet të "rimendojë" mënyrën e rekrutimit. Pavarësisht se Kievi ka ulur moshën e rekrutimit për të siguruar trupa të reja, kjo nuk është vetëm një lojë me numra. Mijëra trupa të trajnuar si Oleksandri, një operator radioje në Brigadën e 21-të të Mekanizuar, kanë luftuar për pjesën më të madhe të dy viteve të shkuara, pa pushim. "Nëse shkojmë në shtëpi," thotë ai, "ushtarët papërvojë mund të jenë në gjendje të mbajnë vijën e frontit përballë rusëve, por shumë prej tyre do të vdesin." Ai merr celularin e tij në një bunker ku fle bashkë me katër ushtarë të tjerë. “Djemtë e mi janë bërë profesionistë pasi kanë luftuar kaq gjatë”, thotë me krenari komandanti i tyre me nofkën “Chyzh”. Ai tregon raketa lëshuesin e tyre të lëvizshëm të mbuluar me një rrjetë kamuflazhi. Kamioni, i përket viteve 1970, dhe në një farë mënyrë simbolizon gjendjen aktuale të ushtrisë së vjetër. Pavarësisht se i vjetër, atij i mungon elementi kryesor-raketat. Ndonëse ushtria ruse nuk është lidere në luftën moderne, ajo po avancon në disa pjesë të vijës së frontit. Ndaj edhe ushtarët ukrainas gërmojnë llogore të reja rreth 30 km më mbrapa. Trupat pushtuese kanë marrë tani mësime taktike dhe kanë epërsi ajrore. Moska po ashtu ka rritur prodhimin e armëve dhe po mobilizon ushtarë me ritme më të shpejta se Ukraina. Ndërkohë, pyetja që bëjnë këta ushtarë në vijën e frontit, është: Po sikur lufta të zgjasë 10 vjet?