Pentagoni ka bërë të ditur se 31 tanke amerikane Abrams, kanë mbërritur në bazën ushtarake Grafenëoehr në Gjermani, ku ekuipazhet ukrainase do të nisin menjëherë trajnimin për përdorimin e tyre. Zëdhënësi i Pentagonit, gjeneral brigade Pat Ryder, tha se një program i zgjeruar trajnimi për ekuipazhet ukrainase është hartuar dhe ka si qëllim t’i përgatisë ata për rolet e tyre kritike. Tanket e përdorura në trajnim do të jenë ndryshe nga ata që SHBA do të dërgojë për përdorim në fushëbetejë – konfirmoi po ashtu zëdhënësi Ryder. Ai shtoi se tanket që do ti jepen Ukrainës, po kalojnë aktualisht në një proces vlerësimi dhe përmirësimi. Ata do të apdejtohen, do të përmirësohen dhe do të përgatiten për tu transportuar për në ukrainë. Atje do të mbërrijnë më vonë gjatë këtij viti. Vetëm trajnimi i trupave ukrainase do të zgjasë për të paktën 10 javë. Sipas zyrtarëve rreth 250 trupa ukrainase do të trajnohen për përdorimin e tankeve amerikane ndërsa të tjerë do të trajnohen për riparimin dhe mirëmbajtjen e tyre. Deri më tani, SHBA ka trajnuar 8800 trupa ukrainase që janë kthyer tashmë në fushëbvetejë ndërsa 2500 të tjerë janë në trajnim. Programi përfshin gjithcka, nga instruksionet bazë për përdorimin e armëve e deri tek kryerja e operacioneve luftarake dhe riparimi i pajisjeve.