Një ngjarje e rëndë u regjistrua në rrugën e një qyteti kinez ku një 25-vjeçar goditi me thikë kalimtarët, duke vrarë 6 persona dhe duke plagosur 14 të tjerë. Incidenti ndodhi pasditen e shtunës në rrugët e Anqing, një qytet 1,200 km në jug të Pekinit. Aktualisht policia është duke hetuar rrethanat që çuan të riun të ndërmerrte aktin ekstrem, pasi motivi ende nuk është sqaruar. Autori i sulmit u arrestua menjëherë nga autoritetet vendase. Kjo nuk është hera e parë që ndodhin ngjarje të tilla në Kinë, ku nw raste tw ngjashme autorët në të kaluarën janë cilësuar si persona me probleme mendore. Ligji kinez kufizon shitjen dhe posedimin e armëve të zjarrit, ndërsa sulmet masive zakonisht kryhen me thika ose eksplozivë artizanalë. Sulmi i fundit u regjistrua vetëm pak javë me parë, ku një burrë goditi me thikë dy fëmijë dhe plagosi 16 të tjerë në një kopsht në Kinën jugore.