Opozita hungareze pritet të kërkojë një seancë të jashtëzakonshme parlamenti për të ratifikuar anëtarësimin e Suedisë në NATO, por përpjekja e tyre mund të dështojë, tha të enjten, kryetari i parlamentit, Laszlo Kover. Parlamenti turk e ratifikoi të mërkurën kërkesën e Suedisë për anëtarësim në NATO, duke e bërë edhe më të afërt hyrjen e këtij vendi në aleancë. Presidenti turk, Recep Tayyip Erdogan, tani pritet të firmosë legjislacionin për Suedinë brenda ditëve. Kjo nënkupton që Hungaria do të jetë anëtarja e vetme e NATO-s, që do të duhet të miratojë kërkesën e Suedisë, në mënyrë që të finalizohet procesi. Kover shtoi ndërkohë se ai "nuk ndjen ndonjë urgjencë të veçantë” dhe se “nuk ka asnjë situatë të jashtëzakonshme" në lidhje me pranimin e Suedisë në NATO. Hungaria e ka akuzuar Suedinë se ka qasje armiqësore ndaj saj. Në mars të vitit të kaluar, zëdhënësi i Qeverisë hungareze, Zoltan Kovacs, kishte akuzuar zyrtarët në Suedi se po qëndrojnë në fronin e superioritetit moral. Kjo pasi Stokholmi e kishte akuzuar më parë Qeverinë hungareze se po rrëshqet kundër parimeve demokratike të BE-së. Megjithatë, ditët e fundit ka pasur përparim. Kryeministri hungarez, Viktor Orban, tha të martën se e ka ftuar homologun e tij suedez në Budapest, për të biseduar për anëtarësimin e Suedisë në NATO. Sekretari i Përgjithshëm i NATO-s, Jens Stoltenberg e ka mirëpritur lajmin nga Turqia, duke thënë se pret që edhe Hungaria t’iu japë fund procedurave sa më shpejt që është e mundur. Suedia, bashkë me Finlandën, u kanë dhënë fund disa dekadave neutralitet më 2022, dhe kanë vendosur t’i bashkohen NATO-s, pas nisjes së luftës së Rusisë në Ukrainë.