Stacionet e metrove janë përmbytur e shumë rrugë kryesore janë bërë të pakalueshme në Nju Jork në prag të mbërritjes së stuhisë Elsa, që po zhvendoset mbi brigjet lindore amerikane pasi u përplas mbi Florida me erëra të forta e shira të rrëmbyeshëm. Reshje të mëdha shiu ranë në një seri stuhish mbi qytet dhe në zonat përreth tij duke shkaktuar përmbytje të mëdha në disa zona. Pasagjerët e metrove postuan foto dhe video në tëitter ku shiheshin platformat e zhytura nën ujë, në veri të Manhatanit. Udhëtarët shiheshin madje të zhytur deri në mes në ujë, në përpjekje për të arritur platformat e stacionit. Disa rrugë të rëndësishme, përfshirë ato në Bronx, u mbyllën përkohësisht, duke krijuar shumë probleme në trafik. Policia e Nju Jorkut postoi imazhe në tëitter të shoferëve të bllokuar në mes të ujit. Shërbimet e motit ndërkohë paralajmëruan edhe përmbytje të tjera në vijim, pasi priten shira akoma më të rrëmbyeshëm të sjellë nga stuhia Elsa. Pavarësisht punimeve për të mbrojtur qytetin, që pas uraganit Sendi në 2012 që vrau 44 persona dhe paralizoi kryeqytetin ekonomik të amerikës për ditë të tëra, Nju Jorku mbetet vulnerabël ndaj përmbyutjeve, me incidente të ngjashme që pritet të shtohen në numër për shkak të ndryshimeve të klimës.