Kuvendi i Maqedonisë së Veriut mban sot seancën për mocionin e mosbesimit të qeverisë, të iniciuar nga opozita maqedonase dhe ajo shqiptare. VMRO-DPMNE, koalicioni Aleanca për Shqiptarët dhe Alternativa si dhe Lëvizja Besa besojnë se kanë siguruar 61 vota të deputetëve nga 120 sa numëron Kuvendi i Maqedonisë së Veriut. Ata do të votojnë për rrëzimin e qeverisë së kryeministrit, Zoran Zaev, i cili dy ditë më parë tërhoqi vendimin për dorëheqje, që e paralajmëroi më 31 tetor, pas disfatës së thellë të partisë së tij Lidhja Social Demokrate (LSDM) në zgjedhjet lokale. Qeverinë aktualisht e përbëjnë LSDM-ja me disa parti të vogla maqedonase që janë përbërjen e saj, Bashkimi Demokratik për Integrim (BDI) dhe Partia Demokratike Shqiptare (PDSH). Sipas Kushtetutës, votëbesimi ndaj Qeverisë duhet të përfundojë në të njëjtën ditë. Nëse opozita siguron 61 vota kundër kabinetit të Zaevit, atëherë Qeveria është e detyruar të japë dorëheqje brenda 24 orëve, e pas kësaj fillon afati dhjetëditor për presidentin e vendit, Stevo Pendarovski që të japë mandatin për formimin e qeverisë së re partive që do të konfirmojë se kanë të paktën 61 deputetë në Kuvendin e Maqedonisë së Veriut.