Lideri i opozitës ruse, Alexei Navalny, i cili dyshohet se është helmuar, ndodhet ende në një koma artficiale, por gjendja e tij është e qëndrueshme dhe simptomat po përmirësohen njoftuan mjekët gjermanë që po kujdesen për të. Navalny, një politikan dhe hetues korrupsioni dhe njëkohësisht njëri prej kritikëve më të ashpër të presidentit rus Vladimir Putin, u ndje keq në avionin me të cilin po udhëtonte nga Siberia drejt Moskës. Ai kishte pirë një filxhan caj në aeroport, ku dyshohet se i është hedhur substanca toksike. Pas shumë përplasjesh me autoritetet ruse, fundjavën e kaluar kryeopozitari u transferua në spitalin Charité në Berlin, ku mjekët gjetën gjurmë të një lënde që bën pjesë në grupin e substancave aktive të quajtur “frenues të kolinesterazës” në trupin e tij. 44 vjeçari Navalny po trajtohet me antidotin atropinë. Sipas specialistëve gjermanë, edhe pse gjendja e tij mbetet serioze, nuk është në rrezik për jetën. Por për shkak se helmimi ka qenë mjaft I rëndë, është ende herët sipas tyre të parashikohen efektet e mundshme afatgjata.Aleatët e Navalny-it këmbëngulin se ai ishte helmuar me qëllim dhe thonë se Kremlini ishte pas këtij sulmi, akuza që zyrtarët rusë i kanë hedhur poshtë si “një zhurmë e kotë”. Ekspertët vënë në dukje se Novichok, agjenti nervor i kohës sovjetike, që u përdor për të helmuar ish-agjentin rus Sergei Skripal dhe vajzën e tij në Britani, ishte një frenues i kolinesterazës.