Spanja planifikon të zbusë rregullat e lejes së punës për të huajt, tha ministri i emigrimit dhe sigurisë sociale të vendit, për të adresuar mungesën e forcës punëtore në industri si turizmi dhe ndërtimi që po kërcënojnë rimëkëmbjen ekonomike të saj. Qeveria ka ndër mend të japë më shumë viza të përkohshme për sektorët që kanë nevojë për punonjës – tha Jose Luis Escriva. “Ne po vlerësojmë aspektet e ndryshme të ligjit të emigracionit dhe atje ku ka hapësira për ta përmirësuar atë do ta bëjmë me qëllim që të mbushim boshllëqet në tregun e punës në spanjë”, tha ai. Mungesat e forcës punëtore janë raportuar në turizëm, bujqësi, ndërtim dhe industrinë e teknologjisë. Qeveria planifikon të lejojë rreth 50 mijë studentë nga jashtë BE të kombinojnë studimet me punën. Ajo po ashtu do të lehtësojë aksesin për leje pune duke lejuar ata që mund të tregojnë një lidhje të mëparshme me spanjën përmes familjes, rezidencës ose të paktën dy viteve punë, edhe nëse kjo e fundit ka qenë jo formale. Në draftin e reformës përmendeshin si punët me më shumë nevojë për punonjës ato të telemarketingut, përfaqësuesve të shitjeve, shoferëve të kamionëve dhe zhvilluesve të softuereve. Industria e turizmit po ashtu po njeh ngritje por kompanitë nuk munden të gjejnë punëtorë që të shërbejnë në tryeza dhe të pastrojnë dhomat e hoteleve, dicka që qeveria e ka karakterizuar si një problem mbarë evropian.