Gjykata e Posaçme Kundër Korrupsionit dhe Krimit të Organizuar ka vendosur së fundmi konfiskimin e pasurive paluajtshme të deputetit të Partisë Demokratike Kasem Mahmutaj. Me urdhër të gjyqtares Etleva Deda, deputetit opozitar të Beratit, iu konfiskuan dy apartamente, dy sipërfaqe trualli dhe një automjet, prona këto që dyshohet se e kanë prejardhjen nga aktiviteti kriminal. Hetimi pasuror i Kasemit, filloi pasi vëllai i tij Gazmend Mahmutaj, është dënuar me 25 vite burgim nga gjykata e Veronës në Itali në vitin 1993, nën akuzën e trafikut të drogës dhe shfrytezimit të prostitucionit. Pas një hetimi të thelluar pasuror, të tre vëllezërve Mahmutaj, konkretisht Kasemit, Gazmendit dhe vëllait tjetër Beharit, togat e zeza të posacme vendosën t’iu sekuestronin 22 pasuri të pajustifikuara të tyre dhe që dyshohen se kanë ardhur si pasojë e këtyre aktiviteteve të paligjshme. Mësohet se gjykata ka bërë një tolerim ndaj vëllezërve Mahmutaj, duke u lënë atyre vetëm një banesë për motive sociale dhe strehimi.