Zgjedhjet e reja parlamentare do të shtyhen në tri provinca për shkaqe sigurie, tha një zyrtar i komisionit zgjedhor në Siri. Zgjedhjet parlamentare në vend, të parat që kur u rrëzua nga pushteti Bashar al-Assad mbi tetë muaj më parë, fillimisht ishin planifikuar të mbaheshin nga 15 deri më 20 shtator. Por, zëdhënësi i komisionit të lartë zgjedhor, tha se votimet do të shtyhen në provincën jugore të Suveidës, por edhe në provincat al-Hassake dhe al-Raka për shkak të “sfidave të sigurisë”. Muajin e kaluar, Suveida, bastion i minoritetit druze të Sirisë, përjetoi dhunë vdekjeprurëse sektare. Provincat al-Hassake dhe al-Raka janë nën kontrollin e milicive të Forcave Demokratike Siriane, të udhëhequra nga kurdët, që kanë raporte të tensionuara me Qeverinë në Damask. Zëdhënësi nuk dha një datë të re, por tha se zgjedhjet në këto tri provinca do të mbahen kur ta lejojnë rrethanat.