Samiti i Ballkanit të Hapur caktoi pikat kyçe ku do të fokusohet politika e përbashkët rajonale përgjatë muajve në vijim. Vendimmarrja përfundimtare e Malit të Zi dhe Bosnjë Hercegovinës pritet të përcaktojë edhe kufijtë e hartës së Ballkanit të Hapur. Stacioni i parë i takimeve do të jetë në korrik, kur do të ngrihet një grup i përbashkët për krizën e përgjithshme, që vjen si pasojë e luftës në Ukrainë. Një zgjidhje e përbashkët do të ulte barrën e peshës që ka mbi çdo vend kjo krizë. Presidenti Vuçiç, propozoi që grupi i punës të mblidhet në Beograd, por ende nuk është zyrtarizuar pikëtakimi për çështjen e krizës ekonomike. Ndërkohë në shtator në Serbi, do jetë edicioni i parë i panairit të verërave dhe ushqimit të Ballkanit të Hapur, ku do jenë të ftuar të gjithë sipërmarrësit dhe qytetarët e rajonit.