Aktivistët për të drejtat e kafshëve të cilët u infiltruan në thertoren “Epe”, filmuan për 20 ditë punëtorët, të cilët keqtrajtonin në mënyrë sistematike bagëtitë dhe derrat, duke i goditur vazhdimisht me sende të forta. Njëri nga aktivistët, Robin, tha se abuzimi është realitet i përditshëm në fabrikë. Pamjet thuhet se janë regjistruar në fund të vitit të kaluar në Holandë, në një thertore ku theren 5,000 derra dhe rreth 600 bagëti në ditë. Mësohet se fabrika ka pezulluar stafin dhe tha se do të zvogëlojë shpejtësinë me të cilën përpunohen kafshët e gjalla. Robin tha se rregullat ishin thyer për të trajtuar sa më shumë kafshë që të ishte e mundur. “Gjatë prezantimit të punës, më thanë që nëse linja e prodhimit do të pushonte së punuari, do të kushtonte 100 euro për minutë, që do të thotë se duhet të përpunosh sa më shumë derra dhe kafshë që të jetë e mundur.” Inspektori i Përgjithshëm për mbrojtjen e kafshëve tha për mediet holandeze se ndihej i tronditur. "Unë u trondita vërtet nga kjo. Ne kemi bërë kontrolle për një kohë të gjatë dhe tashmë jemi paralajmëruar për gjendjen e kafshëve, por nuk mendonim se ishte kaq keq,” tha ai.