Ish-presidenti i Bundestagut, Ëolfgang Schäuble ka ndërruar jetë në moshën 81-vjeçare. Politikani i CDU u nda nga jeta pas një sëmundjeje të gjatë dhe të rëndë, në shtëpi me familjen e tij të martën në mbrëmje rreth orës 20:00, bëri të ditur familija. Në karrierën e tij të gjatë politike, Schäuble ka mbajtur poste të shumta politike në institucione të ndryshme. I lindur më 1942, ishte pjesë e historisë politike të Republikës Federale të Gjermanisë. Politikani i CDU ka qenë deputet i Bundestagut pa ndërprerje që nga viti 1972. Ky është një rekord pasi në rreth 150 vjet të historisë kombëtare parlamentare, askush nuk e ka arritur këtë para tij. "Unë jam një parlamentar me pasion”, thoshte ai vazhdimisht. I pyetur në një intervistë se si ndihej që kishte formësuar politikën në Bundestag për rreth gjysmë shekulli, Schäuble u përgjigj: "Kështu mund ta shihni se sa argëtuese mund të jetë politika”. Dy momente të rëndësishme mund të vecohen në jetën e tij: një tentativë vrasjeje në vitin 1990, e cila e detyroi atë të jetonte në një karrocë invalidi që atëherë. Dhjetë vjet më vonë atij iu desh të hiqte dorë nga udhëheqja e CDU-së dhe bashkë me të edhe nga perspektiva për t'u bërë një ditë kancelar.