Paulin Preka, aktori i njohur i humorit shkodran, Paulin Preka, ka ndërruar jetë në moshën 86 vjecare. Mjeshtri i madh i humorit u nda nga jeta në Itali, ku prej vitesh jetonte bashkë me familjen. Ai ka luajtur me dhjetëra role në teatër dhe kinematografi dhe ka shkaktuar shumë të qeshura me estradën e shkodrës, në aktivitete brenda dhe jashtë vendit. Ai lindi në shkodër në 1935-ën në një familje të varfër. Hapat e parë në karrierën si aktor, i hodhi në vendlindjen e tij të dashur dhe dalë nga dalë u ngrit mes emrave që krijuan një plejadë të papërsëritshme. Që në moshë të re ai u bë pjesë e shoqërisë artistike të kishës katedrale të shkodrës që zhvillonte vec aktiviteteve fetare edhe aktivitete kulturore dhe edukative. E në moshën 8 vjecare, daton edhe interpretimi i parë i Paulin Prekës, në një melodramë që u pëlqye asokohe nga publiku shkodran. Në moshën 11 vjecare ai u rikthye në skenë me dramën Djemtë e Rrugës Pal, të Ferenz Molnar, që u interpretua nga nxënësit e shkollës pashko vasa. Dhe ky ishte vetëm fillimi... Me batutat e holla dhe origjinalitetin e tij, Preka u bë shumë shpejt simbol i estradës së shkodrës. Ai numëron me qindra role në teatër e kinematografi. Ndër më të spikaturit janë: “Daja i burrit”, “Dhëndri nga Amerika”, “Fotografisti”, “Toka jonë”, “Kunati i shokut Xhemal”, “Trualli i zënë” etj. E në mbi 40 vite karrierë, ai është vlerësuar edhe me titullin Artist i Merituar.