Autoriteti i Konkurrencës thotë se ka ngritur një grup pune për monitorimin e tregut në rast të rritjes abuzive të çmimit të produkteve të bulmetit. "Për monitorimin e tregut të tregtimit me shumicë dhe pakicë të nënprodukteve të qumështit", Autoriteti i Konkurrencës thotë se nisur nga disa informacione të bëra publike në media mbi njoftimin e ndërmarrjeve të përpunimit të qumështit, të cilat kanë lajmëruar pikat e shitjes me pakicë se, duke nisur nga data 15.02.2023, furnizimet e reja të bulmetit do të kenë çmime deri në 37 për qind më të larta, vendosi ngritjen e Grupit të Punës për monitorimin e këtij tregu. Autoriteti po monitoron në terren me qëllim evidentimin nëse ky njoftim do të zbatohet në tregun e shitjes me pakicë dhe, mbi të gjitha, nëse kjo sjellje është abuzive e si rrjedhim në shkelje të ligjit "Për mbrojtjen e konkurrencës".