Policia e Shtetit ka dhënë detaje këtë të shtunë lidhur me pjesëmarrjen në operacionin e EUROPOL për goditjen e paligjshmërisë e shtrirë në 27 shtete të ndryshme, përfshirë Shqipërinë. Në njoftimin për shtyp të Policisë bëhet e ditur se në këtë operacion ndërkombëtar të koduar si ‘Jad See’ – “Ditët e Përbashkëta të Veprimit në Europën Juglindore”, janë përfshirë rreth 11 mijë efektivë, ndërsa kanë rënë në pranga 330 persona. Si rezultat i këtij operacioni, bëhet e ditur se janë kontrolluar 33.418 persona, 724 vende të ndryshme dhe 22.605 automjete, si dhe janë konfiskuar 154 armë zjarri, 57 granata dore dhe eksplozivë, 2125 copë municione, 719 kg kanabis dhe 920 bimë marijuanë. Ndërkohë vetëm në vendin tone, sipas policisë janë arrestuar 19 persona, proceduar 18 të tjerë dhe shpallur një kërkim 1 qytetar, mbi të cilët rëndojnë akuzat si prodhimi dhe shitja e narkotikëve në 14 raste, dhënie ndihmë për kalim të paligjshme të kufirit (lehtësimit të migracionit të paligjshëm) në 8 raste, prodhimi dhe shitja e narkotikëve dhe mbajtja pa leje e armëve dhe municioneve në 3 raste, trafikim i mjeteve motorike në 2 raste, falsifikimi i dokumenteve (mashtrimit me dokumentet) në 1 rast, kalimi i paligjshëm i kufirit në 1 rast dhe armëmbajtje pa leje në 1 rast, ku janë sekuestruar dy armë zjarri, lëndë narkoitke, kokainë, heroninë, e cannabis si dhe janë bllokuar 143 emigrantë të paligjshëm. Në këtë operacion Policia jonë ka angazhuar 681 punonjës.