Në përfundim të punimeve treditore të Konferencës Ndërkombëtare të Komisionerëve për të Drejtën e Informimit të zhvilluar në Berlin, Shqipëria është zgjedhur në mënyrë unanime në krye të Presidencës së këtij forumi për periudhën 2025–2027. Zgjedhja e Shqipërisë në këtë rol konsiderohet si vlerësim ndaj institucionit të Komisionerit për të Drejtën e Informimit dhe Mbrojtjen e të Dhënave Personale. Komisioneri Besnik Dervishi shprehu mirënjohjen për besimin e dhënë nga anëtarët e forumit dhe tha se Shqipëria ka identifikuar objektivat gjatë presidencës dyvjeçare. Konferenca e ICIC, e cila u mbajt nga data 23 deri më 25 qershor 2025, mblodhi në Berlin përfaqësues të institucioneve të pavarura, organizatave të shoqërisë civile dhe ekspertë nga e gjithë bota, për të diskutuar çështje kyçe që lidhen me transparencën, llogaridhënien dhe aksesin në informacion publik.