Shpërthimet e njëpasnjëshme në një objekt ku ishte vendosur Komisioni Komunal i Zgjedhjeve në Mitrovicën e Veriut kanë bërë që tensionet në këtë pjesë të trazuar të vendit, të rriten sërish. Hija e dyshimit për shpërthimet e përsëritura bie te zgjedhjet e pjesshme që do të mbahen më 18 dhjetor, në katër komunat me shumicë serbe në veri të kosovës. Zyrtarët zgjedhorë shkuan të martën në ndërtesën e komunës së Zubin Potokut, të shoqëruar nga forcat e policisë, por rreth orës 17 nisën shpërthimet. Ministri i Punëve të Brendshme të Kosovës, Xhelal Sveçla tha se “në veri të vendit, individë të maskuar kanë sulmuar zyrtarët komunalë të zgjedhjeve dhe zyrtarët policorë me bomba shokuese si edhe kanë qëlluar në ajër”. Pas këtij reagimi, rreth orës 18:00 pati sërish një shpërthim në Mitrovicë të Veriut. Në vendngjarje shkuan policia dhe EULEX. Ekipet e policisë shkatërruan atje një bombë dore që ishte brenda zyrës së Komisionit Komunal Zgjedhor. Burime nga mediat kosovare bëjnë me dije se, pas këtyre incidenteve, reagoi përsëri Policia e Kosovës, e cila përmes një deklarate për shtyp sqaroi situatën dhe tha se aktualisht gjendja në terren është stabilizuar.