Në Stamboll ka shpërthyer një protestë masive dhe përplasje me policinë pas arrestimit të kryetarit të bashkisë, Ekrem Imamoglu. Sipas raportimeve të mediave të huaja, edhe pse autoritetet kishin ndaluar tubimet, studentët e universitetit u mblodhën për të shprehur kundërshtinë e tyre. Policia është përpjekur të ndalojë marshimin, por mijëra protestues, të cilët brohorisnin slogane për demokracinë, arritën të kalonin barrierat e forcave të rendit. Studentët apeluan për mbështetje nga të tjerë dhe theksuan nevojën për të mbrojtur të drejtat dhe liritë demokratike. Protesta vazhdoi me një marshim drejt Bashkisë së Stambollit. Studentët kanë paralajmëruar se do të vazhdojnë protestat në ditët në vijim. Ekrem Imamoglu, kryetar i Bashkisë së Stambollit dhe anëtar i Partisë Republikane Popullore është arrestuar nën akuza për korrupsion dhe lidhje me terrorizmin. Arrestimi erdhi pas një kontrolli në shtëpinë e tij, ndërkohë që janë lëshuar urdhra arresti për rreth 100 individë të tjerë, përfshirë gazetarë dhe biznesmenë, për akuza të ndryshme, nga korrupsioni deri tek terrorizmi. Imamoglu përballet me dy hetime që përfshijnë akuza për udhëheqje të një organizate kriminale, ryshfet dhe manipulim tenderash.