Sulmet më të mëdha ajrore të Rusisë kundër Ukrainës - prej nisjes së luftës - lanë të vdekur të paktën 19 persona më 10 tetor, dhe kthyen mijëra ukrainas nëpër bodrume dhe vendstrehime. Mirëpo analistët ushtarakë të Perëndimit kanë thënë se sulmet kanë pasur koston e vet, sepse kanë pakësuar numrin e raketave ruse me rreze të gjatë, nuk kanë goditur asnjë shënjestër ushtarake dhe nuk kanë ndryshuar rrjedhën e luftës që po zhvillohet keq për Moskën. “Rusisë i mungojnë raketat për të kryer sulme të këtij lloji, dhe janë duke iu harxhuar rezervat ndërsa, në anën tjetër, ukrainasit janë duke pretenduar sukses të madh në shkatërrimin e disa raketave në ajër”, thotë Laërence Freedman, profesor për studime të luftës në Kolegjin King të Londrës. “Prandaj, kjo nuk është strategji e re për të fituar luftën, por zemërim i një sociopati”. Ukraina tha se në sulmin e të hënës në Kiev, Rusia ka lëshuar 83 raketa nga deti i zi, po ajo rrëzoi të paktën 43 prej tyre. Moska ka thënë se ka nisur më shumë se 70 raketa dhe të gjitha shënjestrat janë goditur. Cdo raketë, Kalibr vlerësohet se kushton më shumë se 6.5 milionë dollarë, çka nënkupton se Moska ka lëshuar në ajër raketa në vlerë të gati gjysmë miliardi dollarë brenda një dite. Analistët perëndimorë nuk kanë të dhëna të sakta sa raketa i kanë mbetur Rusisë, mirëpo sugjerojnë se sasitë janë të kufizuara.