Bllokohet një gomone e cila qarkullonte jashtë perimetrit të përcaktuar në Jalë duke vënë në rrezik jetën e pushuesve, teksa ndaj drejtuesit të mjetit lundrues u caktua një gjobë prej 100 mijë lekësh. Mësohet se Shërbimet e Stacionit të Policisë Kufitare Dhërmi, në bashkëpunim me ata të Njësisë Policore Detare, pas informacioneve të marra se një mjet lundrues kishte shkelur perimetrin e sigurisë, shkuan menjëherë në zonën e Jalës ku konstatuan mjetin lundrues gomone që lëvizte jashtë perimetrit të caktuar për këtë aktivitet. Menjëherë, shërbimet e Policisë Kufitare bënë bllokimin e mjetit lundrues, si dhe ndëshkuan drejtuesin e tij shtetasin me iniciale I. B, me masë administrative. Kontrollet vijojnë në të gjithë hapësirën ujore të vendit. Policia e Shtetit apelon sërish për drejtuesit e mjeteve lundruese që ta kryejnë këtë aktivitet, pas pajisjes me dokumentacionin përkatës dhe të respektojnë me rigorozitet perimetrin ujor të sigurisë për pushuesit.