Tetë minatorë kanë humbur jetën dhe më shumë se 18 të tjerë janë plagosur, si pasojë e shembjes së një galerie në minierën e qymyrit “Soko” afër Sokobanjës në Serbinë lindore, tha të premten Ministria e Minierës dhe Energjetikës në këtë vend. Këtë informacion e ka konfirmuar edhe drejtori i Shtëpisë së Shëndetit në Aleksinac, Rodolub Zhivadinoviç, i cili tha se disa qendra përreth kanë dërguar të gjitha ekipet e tyre për ndihmë, ndërsa disa nga të lënduarit janë transportuar në Spitalin e Përgjithshëm të Aleksinacit. Aksidenti ndodhi të premten, rreth orës 05:00. Zhivadinovic tha se ende nuk dihet sa minatorë kanë mbetur brenda. Drejtori i Spitalit të Përgjithshëm në Aleksinac, Goran Vidiç, deklaroi për RTS-në se në terren janë katër ekipe shëndetësore. Ai tha se ka qenë në kontakt me drejtuesit e minierës dhe se 49 minatorë kanë qenë në detyrë. Miniera e Sokos është një kompani publike për nxjerrjen nëntokësore të qymyrit.