Shtetet e Bashkuara përdorën përsëri veton kundër një draft-rezolute të Këshillit të Sigurimit të OKB-së, e cila kërkonte armëpushim të menjëhershëm, të pakushtëzuar dhe të përhershëm në Rripin e Gazës, si dhe i kërkonte Izraelit të hiqte të gjitha kufizimet për dërgimin e ndihmave në enklavën palestineze. Teksti, i hartuar nga 10 anëtarët e zgjedhur të këshillit me 15 vende, kërkonte gjithashtu lirimin e menjëhershëm, me dinjitet dhe pa kushte të të gjitha pengjeve të mbajtura në Gaza. Zëvendësja e të dërguarit të posaçëm amerikan për Lindjen e Mesme, Morgan Ortagus, tha se teksti nuk ishte i mjaftueshëm në dënimin e Hamasit dhe nuk e njihte të drejtën e Izraelit për vetëmbrojtje. Draft-rezoluta mori 14 vota pro gjatë votimit që u mbajt të enjten vonë. Kjo është hera e gjashtë që SHBA përdor veton në Këshillin e Sigurimit lidhur me luftën pothuajse dyvjeçare mes Izraelit dhe militantëve palestinezë të Hamasit. “Zia e bukës është e konfirmuar në Gaza, jo e parashikuar, jo e shpallur, por e konfirmuar”, tha ambasadorja e Danimarkës në OKB, Christina Markus Lassen, para votimit. “Ndërkohë, Izraeli ka zgjeruar operacionin e tij ushtarak në Qytetin e Gazës, duke thelluar edhe më shumë vuajtjet e civilëve. Për pasojë, kemi këtë gjendje katastrofike, këtë dështim njerëzor dhe humanitar, që na detyron të veprojmë sot”, shtoi ajo. Qyteti i Gazës dhe zonat përreth po vuajnë zyrtarisht nga uria, e cila me gjasë do të përhapet akoma më shumë. Shtetet e Bashkuara tradicionalisht mbrojnë aleatin e tyre, Izraelin, në OKB. Por, në një veprim të rrallë javën e kaluar, ato mbështetën një deklaratë të Këshillit të Sigurimit që dënonte sulmet e fundit në Katar, megjithëse teksti nuk përmendi në asnjë pjesë përgjegjësinë e Izraelit. Ky veprim pasqyroi pakënaqësinë e presidentit amerikan, Donald Trump, me sulmin e urdhëruar nga kryeministri izraelit, Benjamin Netanyahu. Megjithatë, vetoja e së enjtes tregoi se vetëm një javë më vonë, Uashingtoni po i ofron sërish mbrojtje të fortë diplomatike Izraelit.