Sekretari amerikan i Mbrojtjes, Lloyd Austin, pritet t’i bëjë presion Izraelit që t’i japë fund ofensivës së tij në Gazë gjatë vizitës së tij atje. Kjo vizitë përbën edhe testin e fundit nëse SHBA mund të përdorë mbështetjen e saj të palëkundur për Izraelin për të zbutur ndikimin shkatërrues të ofensivës ndaj civilëve palestinezë. Franca, Mbretëria e Bashkuar dhe Gjermania, që janë disa prej aleateve më të ngushta të Izraelit, iu bashkuan thirrjes globale për armëpushim gjatë fundjavës dhe protestuesit izraelitë kërkuan që Qeveria të rinisë bisedimet me Hamasin për të liruar më shumë pengje, një ditë pasi tre pengje izraelite u vranë gabimisht nga trupat e vendit. Kryeministri izraelit, Benjamin Netanyahu, ka insistuar që Izraeli do të vazhdojë të luftojë derisa të largojë nga pushteti Hamasin, të shkatërrojë aftësitë e tij ushtarake dhe të kthejë pothuajse 129 pengjet që ky grup radikal mori gjatë sulmit të 7 tetorit, që edhe nxiti luftën. SHBA ka vendosur veto ndaj thirrjeve ndërkombëtare për armëpushim dhe i ka dërguar armatim Izraelit, por po ashtu ka kërkuar që Izraeli të ndërmarrë hapa për të shmangur viktimat në mesin e civilëve. Gjatë dhjetë javëve luftë mes Izraelit dhe Hamasit janë vrarë mbi 18.700 palestinezë dhe Gaza është pothuajse e rrënuar. Rreth 1.9 milion palestinezë, pothuajse 85 për qind e popullsisë së Gazës, janë larguar nga shtëpitë e tyre dhe shumica janë vendosur në kampe të ngritura nga Kombet e Bashkuara dhe kampe të tjera në pjesën jugore të territorit të rrethuar. Austin, që së bashku me shefin e Shtabit të Përgjithshëm, gjeneralin CQ (Si Kju) Broën do të qëndrojnë në Izrael, pritet t’i bëjë presion liderëve izraelitë që të kalojnë në një fazë më precize, me operacione të shënjestruara që do të synonin vrasjen e liderëve të Hamasit, shkatërrimin e tuneleve dhe shpëtimin e pengjeve.