Zëdhënësi i sigurisë së Shtëpisë së Bardhë, John Kirby deklaroi se forcat e Ukrainës kanë bërë nJë përparim të dukshëm kundrejt pozicioneve të fortifikuara ruse në jug të vendit. Kirby theksoi se veçanërisht në 72 orët e fundit, ushtarët ukrainas kanë avancuar shumë në rajonin e Zaporizhias, pavarësisht betejës mjaft të ashpër që po zhvillohet. Megjithatë Kirby u shpreh se edhe vetë Kievi zyrtar e kishte pranuar se avancimi në jug, që synonte ndarjen e korridorit tokësor rus drejt Krimesë, po shkonte më ngadalë sesa pritej. Në jug, Rusia besohet se ka ndërtuar një sistem të përpunuar llogoresh dhe tunelesh, të mbrojtura nga fusha të minuara, si dhe pozicione artilerie dhe të ashtuquajturat barriera betoni antitank "dhëmbët e dragoit". Kievi nisi kundërofensivën në fillim të verës, pasi siguroi armë më të avancuara nga aleatët e tij në Perëndim dhe përgatiti batalionet e sulmit. Por progresi ka qenë i ngadalshëm dhe Kievi vazhdon t'i nxisë vendet e NATO-s të dorëzojnë tanke, pajisje për çminim dhe avionë luftarakë - veçanërisht avionë luftarakë F-16 të prodhuar nga SHBA.