Zëdhënësi i Ministrisë së Jashtme të Iranit kritikoi atë që e quajti “prani destabilizuese” të Shteteve të Bashkuara pas dislokimit të bombarduesve B-52 në rajon. “Ne gjithmonë kemi besuar se prania e Amerikës në rajon është prani destabilzuese”, tha zëdhënësi gjatë një konference për shtyp, pasi u pyet për dislokimin. Ai shtoi se kjo prezencë “nuk do të pengojë vendosmërinë e Iranit për të mbrojtur veten”. Fundjavën që kaloi, ushtria amerikane njoftoi për dislokimin e bombarduesve B-52 në Lindjen e Mesme si paralajmërim ndaj Iranit, i cili është zotuar se do të përgjigjet ndaj sulmeve që Izraeli kreu kundër shënjestrave iraniane më 26 tetor. Sulmi i Izraelit ishte hakmarrje ndaj breshërisë së raketave dhe dronëve që Irani lëshoi drejt Izraelit më herët, më 1 tetor. Ky sulm iranian po ashtu ishte hakmarrje, pasi izraeli vrau në Damask të Sirisë udhëheqës ushtarakë të grupeve që mbështeten nga Irani dhe një komandant të Gardës Revolucionare Islamike të Iranit. Të paktën katër ushtarë u vranë gjatë sulmit të Izraelit kundër Iranit dhe Teherani tha se sulmi shkaktoi “dëm të kufizuar”. Zëdhënësi i ministrisë së jashtme të vendit tha ndërkohë se përgjigja e Iranit do të jetë “vendimtare”. Ai shtoi se Irani “mbështet të gjitha nismat dhe përpjekjet” për arritjen e armëpushimit në Gaza dhe Liban, ku Izraeli është duke luftuar kundër dy grupeve që mbështeten nga Teherani. Zëdhënësi tha se qëndrimi i Iranit kundër ndryshimit të doktrinës perëndimore dhe prodhimit të armëve bërthamore, mbetet i njëjtë. Duke cituar fjalimin e fundit të liderit suprem, Ajatollahut Ali Khamenei, zëdhënësi tha se Republika Islamike do të “pajisjet me gjithçka që i duhet për të mbrojtur veten”.