Partnerët perëndimorë të Malit të Zi, i kanë kërkuar autoriteteve të mos hezitojnë për t’iu bashkuar nismës Open Balkan, të ndërmarrë nga Shqipëria, Maqedonia e Veriut dhe Serbia – thotë Zlatko Vujovic, shef i qendrës për monitorim dhe kërkime Cemi. “SHBA ka shfaqur dëshirën që Mali i zi të jetë anëtar i kësaj nisme, edhe pse një gjë e tillë nuk mund të jetë në interes të vendit. Kaq shumë vende të pastabilizuara në një projekt të vetëm, do të destabilizonin dhe shkatërronin vetë projektin. Këto vende, thjeshtë nuk janë në nivelin e zhvillimit që nevojitet për objektiva të tilla, kaq ambicioze”, thotë ai. Vujovic pretendon se skema, që përfshin heqjen e barrierave mbi lirinë e lëvizjes së mallrave dhe njerëzve mes vendeve të ballkanit, ka rreziqe që janë të vështirë të eleminohen për momentin për shkak të kufizimeve të vendeve të përfshira. “Heqja e pikave të kalimit kufitar, jo vetëm do të mundësonte lëvizjen e lirë dhe të pakontrolluar të mallrave dhe njerëzve por do të hiqte edhe pengesat për trafikantët e lëndëve narkotike apo cigareve”, shton ai.