Dy senatorë në Shtetet e Bashkuara të Amerikës kërkojnë ngritjen në arenën ndërkombëtare çështjen e shqiptarëve etnikë në Serbi, përkatësisht në Luginë të Preshevës dhe jo vetëm. Lajmi është bërë I ditur nga ish-anëtari i Lidhjes Demokratike të Kosovës, Faton Bislimi, I cili shprehet se dy senatorët në fjalë I kanë dërguar letër Sekretarit amerikan të Shtetit në SHBA, Antony Blinken. Nëprëmjet një postimi në rrjetet sociale Bislimi shprehet se letra vjen si rezultat direkt i punës së tij dhe Ligës Qytetare Shqiptaro-Amerikane bashkë me delegacionin nga Lugina e Preshevës. “Në letrën e tyre, Senatorët i kërkojnë Sekretarit të Shtetit që të ngrisë temën e çështjes shqiptare në Luginë në secilin komunikim apo takim me autoritetet serbe. Letra potencon faktet tanimë të vërtetuara ndërkombëtarisht -- qoftë përmes Raporteve të vet Departamentit të Shtetit apo edhe Rezolutës së Parlamentit Evropian të Majit 2023 -- për diskriminimin shtetëror ndaj shqiptarëve në Luginë, me theks të veçantë, pasivizimin e adresave si metodë administrative e spastrimit etnik. Tutje, në letër kërkohet realizimi i Planit Shtatëpikësh për të drejtat shqiptare në Luginë i pranuar edhe nga Serbia qysh më 2013. "Që nga ajo kohë, qeveria në Beograd ka bërë progres të limituar në implementimin e këtij plani. Asnjë nga pikat prioritare të planit nuk është realizuar në tërësi, e tek përfaqësimi në institucione qeveritare, nuk ka pasë aspak progres," thuhet në letër”, shkroi ndër të tjera Bislimi.