Sekretari amerikan i Shtetit, Marco Rubio, ishte në kryeqytetin hungarez të hënën ku i takua me kryeministrin Viktor Orbán dhe qeverinë e tij, e ku nënshkruan edhe një marrëveshje bashkëpunimi bërthamor civil, të paralajmëruar më herët nga Presidenti Donald Trump. Ky i fundit ka shprehur hapur mbështetjen e tij për nacionalistin Orbán në përpjekjen e udhëheqësit hungarez për rizgjedhje pas dy muajsh. Orbán dhe partia e tij Fidesz po përballen me sfidën e tyre më serioze në zgjedhjet e 12 prillit që kur ai rimorri pushtetin në vitin 2010. Ndalesa në kryeqytetin e Hungarisë vjen pas vizitës së Rubio-s në Sllovaki të dielën, pasi më herët mori pjesë në Konferencën e Sigurisë së Mynihut në Gjermani. Të udhëhequra nga populistë euroskeptikë që kundërshtojnë mbështetjen për Ukrainën dhe mbështesin me zë të lartë Trumpin, Sllovakia dhe Hungaria përfaqësojnë territor miqësor për Rubio-n, ndërsa ai shtyn për të forcuar marrëveshjet e energjisë me të dy vendet e Evropës Qendrore. I konsideruar gjerësisht si avokati më i besueshëm i Presidentit rus Vladimir Putin në Bashkimin Evropian, Orbán ka ruajtur marrëdhënie të ngrohta me Kremlinin pavarësisht luftës së tij kundër Ukrainës, ndërsa ka mbështetur gjithnjë Trumpin dhe lëvizjen e tij MAGA.