6.5 kilogramë kokainë janë sekuestruar në Portin e Durrësit. Sipas uniformave blu lënda narkotike është sekuestruar në kuadër të operacionit “Rada” të nisur që në datë 13 korrik të këtij viti. Si rezultat i kontrollit të imtësishëm, në një nga kontenierët u gjetën dhe u sekuestruan rreth 6.5 kilogramë lëndë narkotike e dyshuar kokainë. Bëhet fjalë për kontenierin e të njëjtës kompani, “Alba Exotic Fruit”. Kokaina ishte e fshehur në një nga kapakët e një prej dhjetë kontejnerëve që u skanuan. Kokaina ishte e ndarë në katër pako dhe ishte ngjitur në kapakun e një prej dhjetë konteinerëve që sjellin banane nga Ekuadori. Kujtojmë se më 13 korrik u ndalua një kamion me banane në portin e Durrësit brenda të cilit u gjetën 12 kg kokainë, e ardhur nga Ekuadori. Lënda narkotike ishte e ndarë në 14 pako dhe ishte e fshehur në pjesën e brendshme të kontejnerit. Deri më tani në prangat e Policisë ka përfunduar shoferi i kamionit që kishte shkuar për të marrë dërgesën; Barjon Gumeni, një prej pronarëve të kompanisë ndërsa në kërkim është shpallur pronari tjetër, Eduart Dauti. “Alba Exotic fruit” është një kompani me seli në Kombinat, Tiranë, dhe operon në treg që nga viti 2011.