Komuniteti shqiptaro-amerikan i ka dërguar një letër presidentit të Shteteve të Bashkuara Joe Biden, në lidhje me sulmin në veri të Kosovës. ‘Ne jemi thellësisht të shqetësuar nga kërcënimi i vazhdueshëm që paraqet Serbia dhe presidenti i saj Vuçiç ndaj Kosovës dhe popullit të saj’, thuhet në letrën e nënshkruar nga rreth 90 shoqata dhe grupe shqiptaro-amerikane. Nënshkruesit e letrës i kërkojnë presidentit Biden një takim për të diskutuar për gjendjen e krijuar. Sulmi i 24 shtatorit në fshatin Banjskë të Zvecanit nga grupe të armatosura rezultoi fatal për efektivin e Policisë së Kosovës Afrim Bunjaku, i cili humbi jetën në krye të detyrës. Po ashtu edhe dy efektivë të tjerë u plagosën. ‘SHBA dhe BE duhet të marrin masa ndaj Vuçiç dhe të mos ta lejojnë atë të nxisë dhunën, të armatosë terroristët dhe të kërcënojë fqinjët e tij. Serbia nuk mund të mbetet anëtare e komunitetit perëndimor duke mbajtur njëkohësisht lidhje të ngushta me Rusinë’, thuhet në letër. Aktivistët shqiptaro-amerikanë vënë në dukje lidhjen e veçantë mes Shteteve të Bashkuara dhe Kosovës.