Liberalizimi i vizave, që hynë në fuqi nga 1 janari i vitit të ardhshëm, por edhe vendosmëria e autoriteteve të Kosovës për zbatimin e ligjit në veri të vendit po nxit serbët në këtë zonë që të pajisen gjithnjë e më shumë me pasaportat e lëshuara nga Prishtina. Të dhënat e Ministrisë së Brendshme të Kosovës, të analizuara nga Radio Evropa e Lirë tregojnë që për këtë vit ka dyfishim të aplikimeve për pasaportë kosovare nga ana e serbëve. Rritje të aplikimeve ka në të nëntë komunat me shumicë serbe, ku në krye është Leposaviqi me 97 për qind. Disa pjesëtarë të komunitetit serb në Kosovë, të cilët janë intervistuar nga REL, thonë se janë të interesuar të pajisen me pasaporta në mënyrë që nga 1 janari i vitit të ardhshëm të mund të lëvizin lirshëm në vendet e BE-së që janë në zonën Shengen. Një nga arsyet për një gjë të tillë, thonë ata, është se janë të përjashtuar nga regjimi pa viza të Serbisë, pra nuk munden dhe nuk do të mund të udhëtojnë në vendet e zonës Shengen me pasaportat e lëshuara nga Serbia.