Prokuroria e Korçës ka sekuestruar pasuritë e shtetasit Edri Buliçka dhe familjarëve të tij, pas dyshimeve se të ardhurat e krijuara kanë ardhur nga aktiviteti kriminal. Organi I akuzës sqaron se pas një hetimi disavjeçar, bazuar në prova arriti në përfundimin se Edri Buliçka të ardhurat e realizuara nga aktiviteti kriminal në trafikun e narkotikëve në Itali dhe Spanjë i ka investuar në pasuri të luajtshme dhe të paluajshme në emër të tij dhe familjarëve të tij në vlera të konsiderueshme parash. Sipas prokurorisë, Edri Buliçka, rezultonte si I punësuar si kamarier në fshatin Udënisht, Pogradec por pas verifikimeve të kryera regjistrimi është fiktiv, dhe nuk punonte në këtë subjekt. Po ashtu në emër të nënës së tij, Edri Buliçka kishte regjistruar një aktivitet tregtar “Shitje online”, që prej muajit Dhjetor 2021 e në vazhdim dhe nga të dhënat, vihet re se adresë e ushtrimit të aktivitetit është ajo e shtëpisë. Nga hetimet e prokurorisë, rezultoi se këta shtetas nuk justifikojnë pasuritë e krijuara me të ardhura të ligjshme. Transaksionet bankare të kryera prej Edri Buliçkës ndër vite paraqiten në vlera të konsiderueshme shumash monetare në lek dhe valutë të huaj, për të cilat nuk justifikohet burimi i krijimit. Për këtë arsye, Prokuroria e Korçës ka sekuestruar një hotel në Pogradec, një truall me pasuri 965 m2, një tjetër truall, 2 apartamente, një biznes të shit/blerjes së makinave, një servis makinash dhe 6 automjete.