Gati dy vjet pas atentateve me lëndë shpërthyese kundër gazsjellësit Nord Stream në Detin Baltik, Prokurori i Përgjithshëm Gjerman, Jens Rommel ka lëshuar urdhërarrestin e parë kundër një personi të dyshuar. Sipas informacioneve bëhet fjalë për një ukrainas që së fundmi ka qëndruar në Poloni. Edhe dy nënshtetas të tjerë ukrainas, mes tyre një femër, janë në mesin e të dyshuarve. Sipas të dhënave ata kanë marrë pjesë në atentatin, me gjasë si zhytës dhe kanë vendosur lëndën shpërthyese në gazsjellës. Informacionet për personat e dyshuar bazohen në të dhëna të shërbimit informativ të një vendi tjetër. Siç është njoftuar, këta persona, në shtator 2022 kanë qenë duke lëvizuar me një jaht me vela "Andromeda" në Detin Baltik. Hetuesit duket se me këtë hap kanë arritur sukses në një nga procedurat hetimore më spektakolare të dekadave të fundit në Gjermani. Në një kohë që Suedia dhe Danimarka i mbyllën hetimet në fillim të vitit për këtë rast, Prokuroria e Përgjithshme Gjermane i vazhdoi hetimet. Sipas mediave, hetuesit kanë mbledhur me sa duket prova të majftueshme për të siguruar një urdhërarrest nga Gjykata Federale. Sipas të dhënave hetuesit gjermanë besojnë se shtetasi ukrainas në kërkim. ka qëndruar së fundmi në periferi të Varshavës. Por momentalisht ukrainasi është në ilegalitet. Nga pala polake nuk ka pasur deri më tani përgjigje në lidhje me kërkesat ligjore të palës gjermane. Mbetet e paqartë nëse segmente të caktuara të autoriteteve ukrainase kanë ndihmuar në përgatitjen dhe zbatimin e aktit të sabotazhit. Në urdhërarrestin e lëshuar nuk flitet për lidhje të drejtpërdrejta me ushtrinë ukrainase apo shërbimet sekrete. Presidenti ukrainas, Zelenski kishte hedhur poshtë çdo përfshirje të vendit të tij me atentatin kundër gazsjellësit. Në pranverë, kreu i shërbimit informativ ukrainas, Kyrylo Budanov tha se asnjë nga zyrtarët në Ukrainë nuk ka të bëjë në asnjë formë me këtë akt sabotazhi.