Pas vrasjes së Sayyed Hassan Nasrallah, Hezbollahu përballet me sfidën e madhe të goditjes së infiltrimit në radhët e tij që i lejoi armikut të tij të deklaruar, Izraelit, të shkatërrojë vendet ku ai mbante armët, të godasë komunikimet e tij dhe të vrasë liderin veteran, vendndodhja e të cilit ishte ruajtur si sekret prej vitesh. Vrasja e Nasrallahut në një seli komanduese të premten erdhi vetëm një javë pas shpërthimit vdekjeprurës nga Izraeli të qindra pagerëve dhe radiove të mbushura me eksploziv. Ishte ky kulmi i një serie sulmesh që kanë eliminuar gjysmën e këshillit drejtues të Hezbollahut dhe kanë shkatërruar komandën e tij të lartë ushtarake. Në ditët para dhe orët pas vrasjes së Nasrallahut, Reuters foli me dhjetëra burime në Liban, Izrael, Iran dhe Siri, të cilët dhanë detaje të dëmit që Izraeli i ka shkaktuar grupit të fuqishëm paraushtarak shiit, duke përfshirë linjat e tij të furnizimit dhe struktura komanduese. Të gjithë kërkuan anonimitetin për të folur për çështje të ndjeshme. Një burim i afërt me Izraelin i tha Reuters, më pak se 24 orë para sulmit, se Izraeli ka shpenzuar 20 vjet duke fokusuar përpjekjet e inteligjencës te Hezbollahu dhe mund ta godiste Nasrallahun kur të donte, duke përfshirë edhe selinë. Personi e quajti inteligjencën "të shkëlqyer", por nuk dha më shumë detaje. Kryeministri izraelit Benjamin Netanyahu dhe rrethi i tij i ngushtë i ministrave autorizuan sulmin të mërkurën, thanë dy zyrtarë izraelitë për Reuters. Sulmi ndodhi ndërsa Netanyahu ishte në Nju Jork për të folur në Asamblenë e Përgjithshme të OKB-së. Nasrallahu i ishte shmangur daljeve publike që nga një luftë e mëparshme e vitit 2006. Ai kishte qenë prej kohësh vigjilent, lëvizjet e tij ishin të kufizuara dhe rrethi i njerëzve që mund ta takonin ishte shumë i vogël, sipas një burimi të njohur me masat e sigurisë së Nasrallah. Vrasja sugjeroi se në grupin e tij ishin infiltruar informatorë izraelitë, tha burimi.