Presidenti ukrainas Volodymyr Zelenski i tha Këshillit të Sigurimit të Kombeve të Bashkuara se lufta mes Rusisë dhe Ukrainës nuk mund të ndalet vetëm me bisedime, por se Moska duhet të detyrohet të pranojë paqen. Zelenski ka kërkuar mbështetjen e liderëve perëndimorë për atë që ai e quan një "plan fitoreje" për t'i dhënë fund luftës që filloi kur Rusia nisi një pushtim të plotë të vendit të tij në shkurt 2022. Zelenski tha se lufta do të përfundonte një ditë, por jo sepse "dikush u lodh nga lufta" ose përmes shkëmbimeve me presidentin rus Vladimir Putin, një referencë për propozimet që Ukraina të lëshojë disa territore të pushtuara nga Rusia për të zgjidhur konfliktin. "Kjo luftë nuk mund të qetësohet me bisedime. Duhet veprim," tha Zelenski, duke falënderuar kombet që kanë ofruar mbështetje për Ukrainën. “Putini ka thyer aq shumë norma dhe rregulla ndërkombëtare saqë nuk do të ndalet vetë, Rusia mund të detyrohet të pranojë paqen, dhe kjo është pikërisht ajo që duhet bërë. Duhet të detyrojmë rusinë të ecë drejt paqes, si agresori i vetëm në këtë luftë, si shkelësi i vetëm i Kartës së OKB-së”, tha Zelenski. Presidenti ukrainas sulmoi Korenë e Veriut dhe Iranin për ofrimin e armëve për Rusinë, duke i quajtur ata "bashkëpunëtorë de facto" të Moskës.